Орал қаласы әкімдігі заңсыз берген 100 гектардан астам жер мемлекетке қайтарылды. Бұл жөнінде Ауыл шаруашылығы министрлігінің баспасөз қызметі хабарлады.
«Жер ресурстарын басқару комитетінің Батыс Қазақстан облыстық департаменті Орал қаласының әкімдігі мен жер қатынастары бөліміне қатысты жер заңнамасының нормаларын сақтау бойынша субъектіге (объектіге) барып профилактикалық бақылау жүргізді. Әкімдік АҚ-ға ауданы 119,7 га жер учаскесін заңсыз бергені, сол арқылы ҚР Жер кодексінің 48-бабын бұзғаны анықталды», – деп жазды АШМ.
Айтып өтелік, индустриялық аймақты ұйымдастыруға арналған учаске Орал–Самара тасжолының бойында орналасқан.
«Бүгінгі күні нұсқама талаптарына сәйкес жер учаскесі мемлекеттік меншікке қайтарылды», – делінген хабарламада.
Жыл соңына дейін 1 млн гектар жер мемлекетке қайтарылады
Бұл туралы Бас прокуратура хабарлаған еді. Мемлекет меншігіне өтуі тиіс учаскелердің көбі – кезінде заңсыз берілген немесе пайдаланылмай бос жатқан.
Оның дені – Ақмола, Ақтөбе, Атырау, Қостанай, Маңғыстау, Павлодар облыстарына тиесілі. Жалпы соңғы төрт жылда мемлекетке 17 миллион гектар жер қайтарылған. Соның есебінен жайылым тапшылығы 29 миллион гектардан 8 миллион гектарға дейін, яғни төрт есе қысқарды.
Сондай-ақ жерге үлесі бар 11 мың адамның құқығы қорғалды.
Сурет: gov.kz