Бүгін Мәжілістің жалпы отырысында Ұлттық банк төрағасы Тимур Сүлейменов 2025 жылғы инфляция динамикасына қатысты түсінік берді.
«Инфляция динамикасы Ұлттық банктің болжамына сәйкес келеді. Жалпы инфляцияның төмендеуі – ұстамды қатаң ақша-кредит саясатына және Үкіметтің инфляцияға қарсы шараларына байланысты. Осы орайда Ұлттық банк биыл жыл басынан бері базалық мөлшерлемені төрт рет төмендетті. Осылайша базалық мөлшерлеме 15,75%-тен 14,25%-ке дейін төмендеді», – деді Тимур Сүлейменов Мәжілістің жалпы отырысында.
Сондай-ақ Тимур Сүлейменов инфляцияға қатысты болжам жасағанда сын-қатер қатар жүретінін де ескеру керек екенін айтты.
«Біздің болжам бойынша 2025 жылы инфляция 5,5-7,5% дәлізінде қалыптасады. 2026 жылы таргетке жақындап, 5%-тен 7%-ке дейінгі аралықта қалыптасады», – деді ол.
Айтып өтелік, өткен айда елде инфляция деңгейі 8,3% болды.
Қыркүйекте тұтыну бағаларының айлық индексі баяулап, 0,4%-ды құрады. Тамыз айында 0,6% болған еді. Ақылы қызметтердің бағасы 1%, азық-түлік емес тауарлардың бағасы 0,6% өсті. Азық-түлік тауарлары бағасының индексі өзгеріссіз қалды.
Өңірлердің ішінде ең жоғары айлық инфляция Қызылорда облысында – 1% (орташа республикалық деңгейден 0,6 п.т. жоғары), ең төменгіcі – Павлодар, Маңғыстау және Жамбыл облысында болды.
Жалпы Қазақстанда жылдық инфляцияның үш ай қатарынан төмендегені байқалады. Шілдеде жылдық инфляция 8,6%-ды құраса, тамыздағы көрсеткіш – 8,4%-ды, қыркүйекте – 8,3%-ға дейін баяулады.
Сурет: Ұлттық банк