Бүгін Атырау облысында жылына 1,25 млн тонна полиэтилен өндіретін зауыттың құрылысы басталды. Жобаға тартылған инвестиция көлемі шамамен 7,4 млрд АҚШ долларын құрайды. Зауыт Атыраудағы «Ұлттық индустриялық мұнай-химия технопаркі» арнайы экономикалық аймағында бой көтереді. Жаңа зауыт – Қазақстанның өңдеу өнеркәсібіндегі ең ауқымды жоба болмақ.
Құрылыс 2029 жылы аяқталады деп жоспарланған. Зауытты іске қосу импортталатын полиэтилен көлемін отандық өніммен алмастыруға және қосылған құны жоғары өнім экспортын ұлғайтуға жол ашпақ. Сонымен қатар жобаның іске асуы ішкі жалпы өнім көрсеткішінің 1,2%-ға өсуіне мүмкіндік береді.
Құрылыс уақытында мыңға жуық жұмыс орны, кешен іске қосылғанда 800 тұрақты жұмыс орны ашылады.
Жобаны Silleno компаниясы жүзеге асырады. Акционерлері – «ҚазМұнайГаз» ҰК АҚ (40%), Sinopec Overseas Investment Holding (30%) және «Сибур Холдинг» ЖАҚ (30%). Жоба акционерлер қаражаты мен халықаралық банктерден алынған несие есебінен қаржыландырылады.
«ҚазМұнайГаз» компаниясының хабарлауынша, кешен 22 полиэтилен түрін шығармақ. Олардың 40%-ы жоғары сапалы премиум санатқа жатады. Бұған Axens (Франция), Univation Technologies (АҚШ) және Chevron Phillips Chemical (АҚШ) сияқты компаниялармен жасалған лицензиялық келісімдердің арқасында қол жеткізілген.
Полиэтилен өндіруге шикізат ретінде этан қолданылады. Шикізат КМГ-ның газ бөлу кешенінде «Теңізшевройл» компаниясының кен орындарынан алынатын құрғақ газдан бөлінеді.
Сурет: polietilen-agro.kz