Енді жедел жәрдем кей шақыртуға тәулік бойы бармауы мүмкін. Бұл санатқа азаматтың өмірі мен денсаулығына қауіп төндірмейтін аурулардың өршуі жатады.
Елде жедел медициналық көмектің қолжетімділігін жақсарту мақсатында Денсаулық сақтау министрлігі жедел медициналық көмек көрсету қағидаларына өзгеріс енгізу жөніндегі бұйрықтың жобасын әзірледі.
Бүгінде жедел медициналық жәрдем бөлімшелерінің фельдшерлік және мамандандырылған бригадалары пациенттерге тәулік бойы медициналық көмек көрсетеді.
Жалпы жедел жәрдем қызметі төрт санатқа бөлінеді. Бірінші санаттағы шақыру – шұғыл медициналық көмек көрсетуді талап ететін, өмірге тікелей қатер төндіретін пациенттің жай-күйі. Бұл шақыртуда жедел жәрдем көмегінің келу уақыты – 10 минутқа дейін. Ал жеделдіктің екінші санатындағы шақыру – медициналық көмексіз адам өміріне ықтимал қатер төнгенде медициналық қызметкерлер 15 минут ішінде жетуге тиісті. Үшінші санаттағы шақырулар – медициналық көмексіз денсаулыққа ықтимал қатер төнгенде. Оған жету уақыты – 30 минутқа дейін. Ал жеделдіктің төртінші санатындағы шақыруға пациенттің өмірі мен денсаулығына тікелей және ықтимал қатер болмаған жағдай жатады.
Енді жаңа өзгерістерге сәйкес, жедел жәрдем төртінші санаттағы шақыртуларға тәулік бойы емес, кесте бойынша, яғни жұмыс уақытында таңғы сағат 08:00-ден 18:00-ге дейін, сенбі күні 8:00-ден 12:00-ге дейін шығады, ал жексенбі — демалыс.
Министрлік қолданыстағы тариф емханаларды ұйымдастыру кезінде жедел медициналық көмек бөлімшесінің барлық шығысын толық жабуды қамтамасыз етпейтінін мәлімдеді.
«Қаржыландырудың жеткіліксіздігі нәтижесінде тәулік бойы жұмыс істейтін бригадаларды ұстаудың тиімсіздігі байқалады, бұл кредиторлық берешектің пайда болуына әкеледі» — деп түсіндірді ДСМ.
Құжат жобасы Ашық НҚА сайтында жарияланды. 8 қазанға дейін жұртшылықтың талқысына ұсынылып отыр.
Айтып өтелік, өткен жылы жедел жәрдем қызметіне 7,6 млн шақырту түскен. Жалпы бригадалар күн сайын орта есеппен 24 мың шақыртуға шығады.
Шалғай елдімекенде шұғыл медициналық көмекті қамтамасыз ету үшін медициналық авиация қызметі жұмыс істейді. Авиация 2023 жылы шамамен екі мың рет ұшқан, оның 1 578-і – өңірлік деңгейде, 435-і Астана қаласында және жетеуі халықаралық деңгейде.
Сурет: pixabay.com