Қазақстанда әр алтыншы адам ресми еңбек келісімшартынсыз жұмыс істейді. Бұл туралы Ranking.kz редакциясы Adam Research компаниясының әлеуметтік зерттеуіне сілтеме жасап хабарлады.
Сауалнама нәтижесі бойынша, бейресми жұмыс істейтін азаматтардың 36,7%-ы 34 жасқа дейінгі жастар. Олардың көбінде жалпы білім (28,2%) мен орта кәсіби білімі (19,1%) бар. Ал жоғары білімі бар жұмысшылардың үлесі – 10,9%.
«Бейресми жұмыспен қамтылғандар көбінесе негізгі білім мен арнайы мамандықты қажет етпейтін салаларда жұмыс істейді, мысалы, құрылыс, қоғамдық тамақтану, сауда және ауыл шаруашылығы салаларында. Респонденттердің төрттен бірін, яки 24,9%-ын, бейресми жұмыс істейтін және үш жылдан бері ауылда тұрып жатқан адамдарды ішкі мигранттар қатарына жатқызуға болады.
Респонденттердің көбі жеке табысының аз екенін көрсеткен. Олардың 20,8%-ы 100 мың теңгеге дейін, 23,1%-ы 100 мыңнан 200 мың теңгеге дейін табыс табатынын айтқан. Қазақстандағы ең төменгі жалақы өткен жылы 85 мың теңге, ал негізгі орташа жалақы үшінші тоқсанда 390,3 мың теңге болғанын ескере отырып, бейресми жұмысшылардың табысы салыстырмалы түрде төмен екенін байқауға болады.
Сондай-ақ сауалнама нәтижесі ресми келісімшартсыз жұмыс істейтіндердің көбі аз қамтылған отбасылардан екенін көрсеткен. Олардың отбасыларындағы жалпы табыс бойынша 26,9%-ы айына 100 мың теңгеге дейін табыс табады, ал 20,8%-ы 100 мыңнан 200 мың теңгеге дейін табады. Сонымен қатар, 61,9%-ының айлығы үнемдеуге мүмкіндік бермейді, бұл олардың тұрмыстық жағдайының қиын екенін көрсетеді.
Сурет: zakon.kz
