Қызылорда қаласында балалар спортын және шығармашылығын қолдауға арналған «Даму бала» платформасы арқылы қызмет көрсететін кәсіпкерлерден 88 млн теңгеден астам қаражатты жымқыру фактісі бойынша сот үкімі шықты. Бұл жөнінде Қаржылық мониторинг агенттігі хабарлады.
Тергеу барысында анықталғандай, мониторингтік топ құрамында болған қатысушылардың бірі өзінің қызмет бабын пайдаланып, сыбайласымен бірге кәсіпкерлерге тексеріс нәтижелерін «оң шешіп береміз» деген желеумен ақша бопсалаған.
«Нәтижесінде олар 88 млн теңгеден астам қаражатты алған. Қаржының бір бөлігі коттедж және автокөлік сатып алуға жұмсалған. Соттың санкциясымен бұл мүлікке тыйым салынды. Сот үкімімен басты айыпталушы кінәлі деп танылып, алты жылға бас бостандығынан айыру және мүлкін тәркілеу жазасы тағайындалды. Оның сыбайласы бес жылға шартты түрде бас бостандығынан айырылды. Үкім заңды күшіне енген жоқ», — делінген агенттік хабарламасында.
Сурет: Pixabay.com
