Мемлекеттің қолдауына мұқтаж азаматтарды әлеуметтік қорғау – мемлекеттік саясаттың негізгі бағыттарының бірі саналатыны белгілі.
Сыбайлас жемқорлыққа қарсы қызметтің мәліметінше, осы саладағы жемқорлық көріністері – тұрақты назарда.
Осы жылы әлеуметтік салада 95 жемқорлық қылмысы тіркеліп, 58 адам әшкереленген. Соның ішінде 34 адам сотталған.
Мәселен, Сыбайлас жемқорлыққа қарсы қызметтің Маңғыстау облысы бойынша департаменті «№2 Жаңаөзен қалалық емханасы» ШЖҚ МКК директоры мен бас бухгалтеріне қатысты сотқа дейінгі тергеуді аяқтады.
Олар мемлекеттік сатып алу шарты шеңберінде медициналық бұйымдарды жеткізбестен жеке компанияның шотына 10,5 млн теңге сомасында ақша аудару арқылы қаражат жымқырды деп күдік болып отыр.
Соттың санкциясымен кәсіпорын директоры қамауға алынған.
26 тамызда Атырау қаласының соты №4 Атырау қалалық емханасының директоры Е.Сабировқа, шаруашылық меңгерушісі А.Әлжановаға, бас бухгалтер М.Дүйсенғалиеваға және кәсіпкер А.Ералиеваға қатысты үкім шығарды.
Алдын алу шаралары шеңберінде сот процесі ашық режимде өткізілді.
Процеске онлайн түрде облыстық денсаулық сақтау басқармасының және оның 28 ведомстволық бағынысты ұйымдарының қызметкерлері қосылды.
Сотталушылар заңнама талаптарын бұза отырып жасалған шарттар шеңберінде іс жүзінде қызмет көрсетусіз кәсіпкерге 231,8 млн теңге сомасында ақша аудару жолымен қаражат жымқырғаны үшін кінәлі деп танылып отыр.
Сот үкімімен оларға бес жылдан жеті жылға дейінгі мерзімге бас бостандығынан айыру жазасы тағайындалды.
Сондай-ақ, емхана басшысы Сабиров өмір бойы мемлекеттік қызметте және квазимемлекеттік сектор субъектілерінде қызмет атқару құқығынан айырылды.
Әлжанова, Дүйсенғалиева және Ералиева мемлекеттік ұйымдарда 7 жыл мерзімге материалдық-жауапты лауазымдарды атқару құқығынан айырылды.
Айта өтейік, сот үкімі заңды күшіне енген жоқ.
Сурет: zhaikpress.kz