Орал қаласынан 40 шақырым жердегі Ұзынкөл ауылының тұрғындары бес күннен бері облыс орталығына қатынай алмай отыр. Ауылға кіреберіс 6 шақырым жол жөндеуге жабылғалы 7 ай өткен. Ал тұрғындар үшін айналма жол дайындалмаған, деп хабарлайды sarapshy.info.
Ауыл тұрғындарының 70 пайызы қалада жұмыс жасайды. Мәселе боп тұрған – трассаға дейінгі 6 шақырым жол. Құрылысы 7 ай бұрын басталған жолдың әлі жартысы да бітпеген. Мердігер компания – «ДКС Приоритет». Жобаға алдымен 351 млн.теңге бөлінген. Кейін республикалық бюджеттен қаржы бөлініп, жоба құны 673 млн.теңгеге жеткен.
Ауыл әкімі азық-түлік жеткізіп жүр
Ұзынкөл ауылында 863 адам тұрады. Тұрғындар ауылдағы мәдениет үйінде қаламен қатынас мәселесін талқылауға жиналды. Жиынға Теректі ауданының тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы Қайрат Сатыбалдыұлы мен мердігер «ДКС Приоритет» ЖШС директорының орынбасары Жарас Сәрсекұлы қатысты.
-Жол құрылысы сәуірде басталса да, әлі бітіре алмай жатыр. Қазір балшықтан тек Нива мен Уаз көлігі ғана өте алады. Барлығы қаладағы жұмыстарына жете алмай қалды. Қатынап оқитын студенттер бар. Денсаулығы нашар қариялар көп, емханаға барулары керек. Ауыл әкімі кеше аяғы ауыр екі әйелді ауруханаға жеткізді. Ауылға күнделікті қажетті нан мен азық-түлікті ауыл әкімі қызметтік Нивасымен тасып жүр. Мердігер жол құрылысын биыл аяқтай алмайтын болса, ауылға дейінгі бұрынғы жолды бірден түгел қырып тастамай, бөлшектеп салуы қажет еді. Мен жұмыс қарқынын көріп, аяқталмай қалуы мүмкін екенін тамыз айынан бастап айтып келемін. Ешкім тыңдамады, — дейді ауыл тұрғыны Есенгелді Захарұлы (суретте).
Айналма жол салса, жоба қымбаттайды
Теректі ауданының тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы Қайрат Досановтың айтуынша, жобалық-сметалық құжаттарда айналма жол салу қарастырылмаған. Оның ойынша, уақытша айналма жол салатын болса, жоба құны 673 млн. теңге емес, миллиард теңгеге жетер еді.
Ауыл тұрғындары бұған кінәлі жобаға тапсырыс беруші дәл осы аудандық мекеме деген пікірде.
-Жоба 2022-2023 жылдарға арналған болса, ауыл тұрғындары екі жыл бойы қай жолмен жүреді деп ойладыңыздар. Неге халықтың жағдайын ойластырмайсыңдар? Неге ауыл тұрғындарымен бірлесіп талқыланбайды? Қоғамдық тыңдалым неге өтпейді? – деді жиналған ауыл тұрғындары.
Мердігер «ДКС Приоритет» ЖШС директорының орынбасары Жарас Ахметовтің айтуынша, шілдеде материал тапшылығы салдарынан тек 5 күн жұмыс жасалған. Жол құрылысы тек тамызда басталып, қыркүйек айында битум болмай тоқтап қалған.
-Битум тек облыста емес, елде тапшы болды. Қазан айында жұмыс жалғасты. Қазір қажет материалдың бәрі бар, тек ауа райы қолайсыз. Айналма жол жобада қарастырылмаған. Бұл сұрақ басынан көтерілді. Біз жобада келісілмеген болса, айналма жол сала алмаймыз. Халық сұрап отыр деп шаруа қожалығының жеріне рұқсатсыз қалай жол саламыз? Бізге түрлі органдар айыппұл салады, – дейді Жарас Ахметов.
«Аяқталмаған жолды пайдалануға бере алмаймыз»
Қазіргі таңда ауылдан күре жолға дейінгі салынып жатқан 6 шақырым жолдың 1 шақырымына асфальт салынған. Екі шақырымына – щебень, қалған үш шақырымына қиыршық тас (гравий) төселген. Ауыл тұрғындары қиыршық тас үстіне щебень төсеп, уақытша пайдалануға беруді ұсынды.
Бұған Теректі ауданының тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы Қайрат Сатыбалдыұлы (суретте) қарсы шықты.
-Қазіргі күйінде пайдалануға берсек, салынып жатқан жолдың осыған дейін дайындалған табаны бұзылады. Кейін оны қалпына келтіруден мердігер бас тартуы мүмкін. Мәселе сотпен шешіледі, алайда жол құрылысы 2-3 жылға созылып кетеді, — дейді ол.
Қайрат Досанов ауылда жол талғамайтын көліктерден кезекшілік ұйымдастырып, уақытша қиындыққа шыдай тұруды сұрады. Бұған ауыл тұрғындары келіспеді.
Мердігер екі ай уақыт сұрайды
Бүгінде ауыл тұрғындары даламен тіке қатынап жүр. Олар жүрген дала жолының кей тұстары өте қатты балшыққа айналып, жол талғамайтын көліктердің өзі зорға өтуде. Мердігер компания басшысының орынбасары Жарас Ахметов осы қиындық туғызатын тұстарға щебень төсеп беруді ұсынды. Тұрғындар ми балшыққа айналған дала жолына щебень төсеу ақылға сыйымсыз екенін, оның балшыққа сіңіп кететінін алға тартады. Айналма жол 8-9 шақырымға созылады. Оған щебень төсеп шығу да аз шығын болмайтыны анық.
-Кішкене шыдамдылық танытып, бізге екі ай уақыт беріңіздер. Ауа райы қолайлы болса, асфальт төсеп үлгереміз, — дейді мердігер.
Ауыл тұрғындары қар жауған соң салынған асфальт жолдың сапасына сенбейтіндерін жеткізді. Бірауыздан бөлінген қаражатты тиімді жұмсап, жолды сапалы салуды сұрайды. Сондықтан ауыл тұрғындары әлі аяқталмаған жолды қыс мезгілінде уақытша пайдалануға бере тұруды, ал жол құрылысын келесі жылы күн жылығасын жалғастыруды ұсынды.
Жол құрылысына тапсырыс беруші мекеме мен мердігер мәселенің шешімін әлі тапқан жоқ. Ұзынкөл ауылының тұрғындарының қаламен қатынас мәселесі қашан және қалай шешілетіні әзірге белгісіз.
Нұрлыбек Рахманов, Батыс Қазақстан облысы
Фото, видео автордан