Батыс Қазақстан облысының аумағында LLY Agro Energy және Azimut Capital Limited компаниялары салған екі цифрлық майнинг фермасы тіркелген. Бұл туралы Цифрлық даму, инновациялар және аэроғарыш өнеркәсібі министрлігі Sarapshy.info агенттігіне берген ресми жауабында хабарлады.
Майнинг фермасы – тәулік бойы жұмыс істеп, күрделі есептерді шығару арқылы криптовалюта өндіретін компьютерлер орналасқан орын. Бұл құрылғылар электр энергиясының көп мөлшерін қажет етеді, сондықтан бір майнинг фермасы мыңдаған отбасының айлық жарық шығынымен тең қуат жұмсай алады.
Қазір елімізде Ақтөбе, Алматы, Алматы, Астана, Атырау, Жамбыл, Жетісу, Батыс Қазақстан,, Қарағанды, Маңғыстау, Павлодар, Солтүстік Қазақстан және Шығыс Қазақстан облыстарында орналасқан 81 майнинг фермасы тіркелген.
2020 жылы Бәйтерек ауданына қарасты Белес ауылында майнинг фермасы ашылған. Оның иесі – қытайлық LLY Agro Energy компаниясы. LLY Agro Energy-дің Орал қаласында орналасқан филиалы бар.
Қазір компанияға 33 түрлі майнинг аппараты тиесілі. Олардың ішінен ең көп электр энергиясын тұтынатыны – Antminer S19-95T. Майнинг фермасында бұл аппараттың 4364 данасы бар және әрбірі сағатына 3,5 кВт энергияны қажет етеді.
Екінші майнинг компаниясын Azimut Capital Limited ашты. Алайда бұл компанияның БҚО-дағы қызметі, орналасқан жері мен өндірістік қуаты туралы ашық ақпарат табылмады. Аталмыш ЖСШ майнингтен бөлек Орал қаласында тұрғын үй салумен айналысады.
Қазақстанда цифрлық майнерлерді электр энергиясымен қамтамасыз етуге «Электр энергиясы мен қуаты рыногының қазақстандық операторы» компаниясы жауапты. LLY Agro Energy мен Azimut Capital Limited ЭҚРҚО клиенттерінің тізімінде бар.
Компанияның есебіне сәйкес 2025 жылдың шілдесінде LLY Agro Energyмайнинг фермасы сағатына 2 мың кВт тұтынған.
Халықаралық энергетика агенттігінің зерттеуі бойынша, 4 адамнан тұратын отбасы айына 300-500 кВт электр энергиясын тұтынады. Демек, бір ғана майнинг фермасының бір айдағы энергия шығыны мыңдаған отбасының тұтынуымен пара-пар.
Естеріңізге сала кетейік, 2025 жылдың тамызында Шығыс Қазақстан облысында майнинг кәсіпорындарына 9 млрд теңгеден астам сомаға электр энергиясы заңсыз берілгені анықталды. Қазір бұл іс бойынша тергеу жүріп жатыр.
фото: ЖИ-генератор
