Батыс Қазақстан облысының Теректі ауданында оқушылар арасындағы жанжал пышақ жарақатымен аяқталды. Бұл туралы облыстық полиция департаментінің баспасөз қызметі хабарлады.
Полицияның мәліметінше, күдікті Қылмыстық кодекстің 293-бабының 3-бөлігі бойынша (бұзақылық) ұсталды. Тергеу мәліметтеріне сәйкес, оқушылар арасындағы жанжал өзара кикілжіңнен басталған.
«Оқиғаға қатысы бар кәмелетке толмағандардың заңды өкілдері балаларды тәрбиелеу жөніндегі міндеттерін тиісінше орындамағаны үшін жауапқа тартылады. Материалдар аудандық әкімдік жанындағы кәмелетке толмағандар ісі жөніндегі комиссияға жолданды», – деп мәлімдеді полиция департаменті.
Оқу-ағарту министрлігі балалардың құқығын қорғау комитетінің төрайымы Насымжан Оспанова да пікір білдірді. Оның айтуынша, жарақат алған оқушыға медициналық көмек көрсетілген, қазір оның жағдайы тұрақты.
«Оқиға орнына облыстық білім басқармасының мобильді тобы мен құқық қорғау органдарының өкілдері аттанды. Қазір мектептерде ата-аналармен және оқушылармен түсіндіру жұмысы жүргізіліп жатыр», – деді ол.
фото: istockphoto.com
