Батыс Қазақстан облысында 30-дан астам мемлекеттік кәсіпорынды жекешелендіру туралы шешім қабылданды. Бұл туралы Ұлттық жекешелендіру кеңсесі хабарлады.
Жекешелендіруге ұсынылған нысандардың қатарында «Батыс Қазақстан аймақтық электр желілік компаниясы», «Жайықтеплоэнерго», «Ақсайжылуқуат», «Орал Құрылыс Жөндеу Сервис» және су, жылу, коммуналдық қызмет көрсететін өзге де ұйымдар бар.
Айта кетейік, қазір «Батыс Қазақстан аймақтық электр желілік компаниясының» Ұлттық электр желісі операторы, жөндеу және инвестициялық жобаларға материал жеткізушілер мен «Бірыңғай сатып алушы» алдында берешегі бар.
Оқыңыз: БҚО-да электр желісі 86% тозған: компания тағы да тариф көтеруді ұсынады
Сонымен қатар өңірдегі «Шалқар табиғаты», «Ақсай жаңғырту» секілді серіктестіктер де жеке меншікке берілмек.
Тізімге білім беру және ғылыми ұйымдар да енгізілген. Атап айтқанда, өңірдегі бірқатар колледждер – Сервис және жаңа технологиялар колледжі, А. Иманов атындағы жол-көлік колледжі, Құрманғазы атындағы музыкалық колледж, Ж. Досмұхамедов атындағы педагогикалық колледж жеке меншікке өтеді.
Бұдан бөлек облыстағы 11 аудандық және бір қалалық ветеринарлық станция жекешелендіруге шығарылған.
2024 жылы Оралда теннис орталығын жекешелендіруге қатысты дау туды. 1,6 млрд теңгеге салынған спорт алаңы 2021 жылы 21 млн теңгеге сатылымға қойылды.
Теннис орталығын жергілікті кәсіпкер Юрий Ткалун иелігіне өтті, алайда жергілікті мәслихат өкілдері орталықты сату туралы шешіммен келіспеген. Ткалун мәслихат депутаттарының шешіміне қарсы шығып, арыз жазған.
Өткен жылдың желтоқсан айында Жоғарғы сот нысанды жекешелендіру туралы шешімді заңсыз деп танып, теннис орталығын мемлекетке қайтарып берді.
фото: freepik.com
