Осы жылғы 1 шілдедегі есеп бойынша Қазақстанның сыртқы қарызы 166,7 млрд АҚШ долларына жетті.
Сыртқы қарыздың 87,5%-ы – ұзақ мерзімді борыш
«Жыл басынан бастап сыртқы борыш төлем балансы бойынша операциялардың есебінен 2,7 млрд долларға, бағалық, бағамдық және басқа өзгерістер есебінен 0,3 долларға өсті.
Қазақстанның сыртқы қарызының құрылымында өтеу мерзімі бойынша 87,5%-ы ұзақ мерзімді (1 жылдан астам) сыртқы борышқа тиесілі. Бұл бір жағынан өтімділік тәуекелдерін азайтады, екінші жағынан жалпы нарықтық талаптар өзгеруінің борышты өтеуге және оған қызмет көрсетуге әсерін күшейтеді», – деп хабарлады Ұлттық банктен.
Қазақстан сыртқы борышының қаржы құралдарының түрлері бойынша құрылымында бейрезиденттерден тартылған несиелер мен кредиттер (73,9%) және бейрезиденттердің қолындағы борыштық бағалы қағаздар (8,0%) басым болды.
Сыртқы борыш деген не?
Сыртқы борыш – белгілі уақыттағы өтелмеген резиденттердің бейрезиденттер алдындағы негізгі борышты немесе пайызды төлеуді талап ететін нақты және сөзсіз міндеттемелері.
Республиканың сыртқы борышы бойынша статистикалық есепте елдің халықаралық инвестициялық позициясында көрсетілген сыртқы міндеттемелердің құрауышы болатын елдің борыштық міндеттемелерінің құны және құрылымы көрсетіледі. Сыртқы борышқа кіретін міндеттеме нақты және өтелмеген болуға тиіс. Кредитордың қарыз алушыға талабының болуы шешуші фактор саналады.
Қарыз бір жылда 1,3 пайызға артқан
Айтып өтелік, биыл 1 қаңтарда сыртқы қарыз 162,7 млрд долларды құрады. Ұлттық банк статистикасында борыштың бір жылда 1,3 пайызға артқаны айтылды.
2023 жылдың басында сыртқы борыш 160,7 млрд доллар болған. Оның басым бөлігі – фирма аралық қарыздар.
Сурет: Ұлттық банк