TSARKA кибершабуылдарды талдау және тергеу орталығы интернеттен қазақстандықтардың жеке деректері енген 16,3 миллион жазбаны тапқан.
TSARKA Group вице-президенті Еңлік Сатиева мәліметтердің барлығы ашық дереккөзде тұрғаны алаңдататынын айтты.
«Әсіресе маңызды жеке деректер тарап кетті: тегі, аты, әкесінің аты, туған күні, ЖСН, мекен-жайы, ұялы телефон, үй немесе жұмыс орны телефонының нөмірлері, тағы басқа деректер бар. Бұл әртүрлі облыстардан жиналған ақпарат болуы мүмкін», — деп түсіндірді Сатиева.
Цифрлық даму, инновациялар және аэроғарыш өнеркәсібі министрлігінің Ақпараттық қауіпсіздік комитеті осыған байланысты тексеру жұмысын бастаған.
«Алғашқы талдау бұл деректердің мемлекеттік емес, яғни жекеменшік ақпараттық жүйелерден алынуы мүмкін екенін көрсетіп отыр. Бүгінгі таңда мемлекеттік ақпараттық жүйелерден дербес деректердің таралуы немесе хакерлік шабуылдар нәтижесінде бұзылуы тіркелген жоқ. Тексеру толық аяқталғанға дейін қандай да бір қорытынды жасау немесе ақпараттың шынайылығын растау ерте», — деп ескертті ведмство.
Егер қандай да бір азаматтардың дербес дерегі анықталса, министрлік eGov порталындағы жеке кабинет арқылы хабарлама жібереді.
Kursiv Media жазуынша, 2024 жылы 5 наурызда Zaimer.kz арқылы қазақстандықтардың 2 миллионнан аса жеке деректері тарап кеткен. Министрлік азаматтарға «Робокэш.кз» микроқаржы ұйымынан моральдық шығын өтеп алу үшін сотқа жүгінуге кеңес берген.
Былтыр «Азаматтарға арналған үкімет» мемлекеттік корпорациясы қазақстандық «Кибершабуылдарды талдау және тергеу орталығы» компаниясымен ынтымақтастық туралы меморандумға қол қойды.
TSARKA – Орталық Азиядағы киберқауіпсіздік қызметтерінің ең ірі жеткізушісі. Қазақстан нарығында 2015 жылдан бастап жұмыс істейді. Компания қауіпсіздік мәселелерін зерттеумен шұғылданады.
