Елде биыл жеті ай ішінде шетелге $2 млрд болатын өңделген табиғи уран экспортталған. Бұл былтырғы жылдың дәл осы айларымен салыстырғанда 54%-ға артық. Сонымен қатар 2015 жылдан бергі ең жоғары көрсеткіш болып отыр.
Барлық өсім бағаның көтерілуімен байланысты. Себебі физикалық түрде экспорт өзгерген жоқ (10,3 млн кг уран, жылдан жылға +1%).
Уран нақты қай елге кетіп жатыр?
DataHub мәліметіне сүйенсек, қаржы бойынша негізгі үлес – РФ-да (46%). Жылдық деңгейде жеткізілімнің жалпы құны 23%-ға артты, десе де, физикалық түрде экспорт шамамен сондай көлемде төмендеді. 1 кг уранның орташа бағасы тиісінше көтерілді (+63%).
Егер доллармен емес, уранды килограмымен есептесек, биылғы басты сатып алушы Қытай болып отыр. Оның үлесі – 44%. ҚХР бір жылда +21%, ақша түрінде +72% сатып алды.
Келер жылы уран өндірісі төрт мың тоннаға артады
Елімізде келер жылдан бастап уран өндірісі ұлғайып, экспортқа жіберілетін дайын өнім тағы төрт мың тоннаға артпақ. Ол үшін өндірістік технологиялар жетілдіріліп, шикізаттың мол қоры бар кен орындарында барлау жұмысы жүргізіле бастайды. Бұдан бөлек уран құрамындағы ілеспе металдарды кәдеге жарату ісі де қолға алынбақ.
«Қазатомөнеркәсіп» мәліметіне сүйенсек, Қазақстанда 56 кен орны бар. Оның 14-де кен өндіріледі, қалғаны резервте. Кен орындары Қызылорда, Түркістан, Солтүстік Қазақстан және Ақмола облыстарында шоғырланған.
Былтыр Қазақстан әлемдік нарыққа 21 мың тонна табиғи уран шығарды, бұл дегеніміз – әлемдегі бастапқы өндірістің тұтас көлемінің 40 пайыздан астамын құрайды.
Сурет: kazatomprom.kz
