Тайландтық «Sea Value Plc.» компаниясы Қазақстанда консервіленген балық өнімдерінің өндірісін іске қосады.
Белгілі болғандай, 2025 жылы Алматы облысында балық өнімдерін қайта өңдеу жобасын іске асыру басталады. Жобаның инвесторы тайландтық – «Sea Value Plc.» компаниясы.
Шикізатты қазақстандық және ресейлік балық шаруашылықтары жеткізеді деп жоспарланған. Өндіріс қуаттылығы күніне 3-5 тонна балық өнімін құрайды. Дайын өнім Таиландқа және басқа елдерге экспортталмақ.
Алдағы уақытта компания ел аумағында өндірілетін өнім желісін кеңейтуді жоспарлап отыр. Оның ішінде үй жануарларына арналған азық-түлік, тауық ақуызы, тауықтан, балықтан жасалған мұздатылған жартылай фабрикаттар, пісте мен бадам сүті және өзгелері бар.
Сондай-ақ, компания қазақстандық дистрибьютормен серіктестікте Алматы облысында өңірлік логистикалық хаб құру бойынша жұмыс істеп жатыр. Хаб компания өнімдерін ЕАЭО және Орталық Азия нарықтарына импорттауға, сақтауға және таратуға арналған.
«Sea Value Plc.» – Таиландтағы екінші ірі консервіленген тунец өндірушісі. Компания өз өнімін әлемнің 150 еліне экспорттайды.
Айтып өтелік, тамызда «KAZAKH INVEST» ҰК» АҚ алаңында ҚР СІМ Инвестициялар комитетінің төрағасы Ғабидолла Оспанқұлов «Sea Value Plc.» Тай компаниясының Доктор Поджа Арамваттананонта президентімен кездесті.
Онда тараптар Қазақстанда консервіленген, өңделген балық өнімдерін, мұздатылған жартылай фабрикаттарды өндіретін зауыт құрылысын іске асыру мәселелерін талқылаған еді.
Сондай-ақ, алдын ала инвестиция көлемінің $6 миллионды құрайтыны мәлім болды.
Аталған компанияның Францияда қайта өңдеу зауыты және Нидерландыда филиалы бар. 2023 жылы компанияның кірісі $847 миллион құраған.
Жалпы қазір Қазақстанның балық өнімдері әлемнің 21 еліне экспортталып жатыр.
Үкімет 2021 жылғы сәуірде балық шаруашылығын дамытудың 2030 жылға дейінгі бағдарламасын қабылдаған. Оның аясында 2030 жылға қарай 270 мың тонна балық өсіру, ішкі тұтынуды жылына 134 мың тоннаға дейін ұлғайту және балықтың табиғи популяциясын 7 пайызға арттыру көзделіп отыр.
Сурет: freepik.com
