ҚР Қарулы күштерінің Бас әскери-медициналық басқармасы бейінді жоғары оқу орнын құру жобасын дайындаған.
Жаңа білім беру мекемесі Алматы қаласындағы Қорғаныс министрлігінің Әскери медицина орталығы базасында құрылмақ.
Қазір жоғары медициналық білім беру және әскери интернатура бағдарламалары бойынша әскери дәрігерлерді Ақтөбе қаласындағы Әуе қорғанысы күштерінің әскери институты базасында Марат Оспанов атындағы Батыс Қазақстан медицина университетімен бірлесіп дайындайды.
Ал жоғары оқу орнынан кейінгі медициналық білім беру бағдарламасы бойынша әскери-медициналық кадрларды дайындау «Астана» медициналық университетімен академиялық ұтқырлық шеңберінде Ұлттық қорғаныс университетінің әскери медицина кафедрасының базасында жүзеге асырылады.
Халықаралық ынтымақтастық желісі бойынша Ресейде, Өзбекстанда, Арменияда, Қытайда және Түркияда жоғары және жоғары оқу орнынан кейінгі медициналық білім беру бағдарламалары бойынша мамандар даярланады.
«Шетелде әскери медициналық білім алу тілдік кедергілердің, ұлттық және мәдени айырмашылықтардың болуымен, сондай-ақ дипломды тану рәсімдерінің ерекшеліктерімен байланысты екенін атап өткен жөн. Жобаны іске асыру қолда бар мекемелерді қайта ұйымдастыруды, қажетті инфрақұрылымды, академияның оқу-материалдық базасын құруды, білім беру бағдарламаларын әзірлеуді және лицензия алуды талап етеді», – делінген хабарламада.
Ұйымдастыру шаралары қорғаныс ведомствосының мүдделі құрылымдық бөлімшелерімен, Денсаулық сақтау, Ғылым және жоғары білім министрліктерімен, «Қазақстан-Ресей медициналық университеті» мемлекеттік емес білім беру мекемесі және «Әскери медицина ардагерлері» қоғамдық бірлестігімен бірлесіп өткізіледі.
Елде әскери медицина қызметінің құрылуын 1992 жылы ҚР Қарулы күштері Бас штабының Әскери-медициналық басқармасы құрылған кезден бастау алатынын атап өткен жөн.
Қарулы күштердегі емдеу, алдын алу қызметі құрамында емханалық бөлімшелері бар сегіз әскери госпиталь мен төрт лазаретте жүзеге асырылады. Сонымен қатар әскери бөлімдер мен мекемелерде 139 медициналық бөлімше жұмыс істейді.
Ресми дерекке сүйенсек, жыл сайын әскери медициналық мекемелерде стационарлық жағдайда орта есеппен 18 мыңға жуық пациент ем алады. 180 мыңға жуық адам амбулаториялық ем қабылдайды. Сондай-ақ 2,5 мыңнан астам ота жасалады.
Сурет: Қорғаныс министрлігі