Қазақстанда отау көтеретін жастар көбіне тамыз айында неке қияды. Ұлттық бюро статистикасы жариялаған 2015 және 2024 жылдардағы деректерге сүйенсек, дәл осы айда елімізде ең көп неке тіркелді.
Он жылдық статистика бойынша тамызда орта есеппен 14,9 мың жұп отбасын құруға шешім қабылдайды. Рекордтық көрсеткіш 2016 жылға тиесілі. Дәл осы жылы тамыз айында 16,9 мың неке қиылған.
Ал 2015-2022 жылдар аралығында шілде мен қыркүйек қазақстандықтар шаңырақ көтеруді қолай көретін айлардың қатарында болса, кейінгі екі жылда қыркүйек маусымға «жол берді». Мәселен, биылғы 2024 жылдың маусым айында 11,6 мың неке тіркелсе, қыркүйекте бұл көрсеткіш 10,8 мың болған.
Осылайша, 2023 жылдан бері маусым, шілде және тамыз айлары – қазақстандықтарға отбасын құру үшін ең қолайлы кезең болып есептелінеді.
Ал қаңтарда қиылатын неке саны өте аз. Кейінгі он жылда бес рет дәл осы ай неке саны бойынша соңғы орыннан көрінген. Мамыр айында да жұптар отау көтеруге асық емес.
Айта кетерлік жайт, соңғы он жылда ең төменгі айлық көрсеткіш 2020 жылдың сәуірінде, COVID-19 пандемиясы кезінде, тіркелген: бар-жоғы — 3,8 мың неке.
фото: ЖИ-генераторы
