Елімізде теңгерімсіздікті жою мақсатында төленетін дивидендтер ескеріліп, банктерге теңгерімді салық салу енгізіледі. Бұл жөнінде Үкімет отырысында Премьер-Министрдің орынбасары – ұлттық экономика министрі Нұрлан Байбазаров айтты.
«Ақша-несие саясаты желісі бойынша банктер мен кредиттік ұйымдардың қызметін реттейтін жаңа Заң жобасы әзірленетін болады. Заң жобасының негізгі міндеттері – экономикалық белсенділікті ынталандыру, цифрлық активтерді және қаржылық технологияларды реттеу. Қабылдау мерзімі 2025 жылдың маусым айы деп жоспарлап отырмыз», – деді Премьер-Министрдің орынбасары.
Оның айтуынша, алдағы уақытта аталған бағыт бойынша теңгерімсіздікті жою мақсатында төленетін дивидендтерді ескере отырып, банк секторына теңгерімді салық салуды енгізу жөнінде шаралар қабылданады.
Айтып өтейік, Мемлекет басшысы Жолдауында Банктер туралы жаңа заң қажет екендігін айтты.
Президент заңда экономикалық белсенділікті қолдау және финтех саласын қарқынды дамыту сияқты өзекті мәселелер шешім табуы керектігін, қазір қолданып жүрген заң шамамен 30 жыл бұрын қабылданғанын тілге тиек етті.
«Ашығын айтуымыз керек, бізде республикалық бюджеттің кіріс бөлігі орындалмай жатыр. Бұл – бұрынғы және қазіргі Үкімет жұмысындағы үлкен олқылық. Мұндай жағдай жиі қайталанса, түптеп келгенде, еліміздің дамуын тежейді. Сондықтан оған жол бермеу қажет. Бюджет қаржысын тиімді пайдаланып, оның шығыс бөлігін шектеп, қатаң бақылауда ұстаған жөн», – деді Қасым-Жомарт Тоқаев.
Қоса кетсек, қаржы нарығын реттеу және дамыту агенттігінің биылғы дерегінше, елімізде 21 банк жұмыс істейді. Оның 11-і шетелдің қатысуымен, 8-і – еншілес банктер.