Ұлттық банк қазақстандық үш банкпен бірлесіп банкаралық QR-төлемдер сервисін іске қосты.
ҰБ дерегінше, сервис клиенттерге кез келген банктің пайдасына банкаралық QR-төлемдерді қабылдауға және жүзеге асыруға мүмкіндік бере отырып, банктердің төлем қызметтерін кеңейтеді.
Белгілі болғаны, бүгіннен бастап банкаралық QR-төлемдер сервисі «Банк ЦентрКредит» АҚ, «Home Credit Bank» АҚ және «Freedom Bank» АҚ клиенттеріне қолжетімді.
– Операция жасау үшін клиент банктің мобильді қосымшасына кіріп, сатушының (сервиске қатысушы банктердің бірінде қызмет көрсетілетін) терминалында QR-кодты сканерлеп, төлемді растауы қажет. Банкаралық QR-төлемдерді іске қосу банктер арасындағы өзара іс-қимыл деңгейін арттырады, ыңғайлы етеді. Сондай-ақ тұтынушы үшін төлем қызметтерінің қолжетімділігін кеңейтеді, – делінген хабарламада.
Ұлттық Банк басқа банктерді де кезең-кезеңімен қосу бойынша жұмысты жалғастырып жатқанын хабарлады. Жаңа қызмет өзге банктердің мобильді қосымшаларында олар ішкі процестерін бейімдеген кезде пайда болады.
– Банкаралық QR-төлемдер сервисі төлем инфрақұрылымын дамыту бағыттарының бірі саналады, – делінген ҰБ ақпаратында.
Еске салсақ, осыған дейін еліміздің барлық банктеріне 2025 жылдан бастап бірыңғай QR-код енгізілетінін жазған едік. Ұлттық банк басшысы жүйені бірыңғай QR немесе түрлі банктердің QR коды деп те атауға болады деген еді.
Сондай-ақ ҰБ төрағасы Тимур Сүлейменов 2022 жылы бірыңғай төлем жүйесін іске қосу сәтсіз аяқталғанын хабарлады. Оған Kaspi мен Halyk Bank-те өзінің дербес QR-төлемі болғаны кедергі болған.
Фото: Pexels.com
