Қарағанды облысындағы Шахтинск қалалық соты «Қазақстан» шахтасында болған өртке қатысы бар бірнеше лауазымды қызметкерге қатысты үкім шығарды. Бұл жөнінде қалалық соттың баспасөз қызметі ақпарат таратты.
2023 жылдың 17 тамызында Қарағанды облысындағы «Қазақстан» шахтасында шыққан өрттен бес кенші қаза тауып, 17 адам жарақат алды.
Кімдер жауапқа тартылды?
Сот алдында директордың өндірістік қызметті өндіру жөніндегі орынбасарының м.а., конвейерлік көлік учаскесінің бастығы және басқа да қызметкерлер жауап берді. ҚР Қылмыстық кодексі 277-бабы 3-бөлігіне сәйкес оларға тау-кен немесе құрылыс жұмыстарының қауіпсіздік ережелерін бұзды деген айып тағылды.
Сот тергеу барысында «Қазақстан» шахтасындағы көмір конвейерінің еңісінде қауіпсіздік талаптары сақталмағанын анықтаған.
«Көмір конвейерінің еңісіне қажетті техникалық төлқұжат болмаған. Металл бекітпелер бұзылып, айқын деформациялар болғанына қарамастан, жұмыс жалғасқан. Орташа тұтанғыштық қасиеті бар конвейер таспасы пайдаланылған. Ұзақ уақыт бойы құрылғыларды тазалау, ескірген роликтерді ауыстыру жұмыстары жүргізілмеген», — делінген хабарламада.
Сот үкімімен барлық айыпталушыға төрт жылға бас бостандығынан айыру жазасы тағайындалды. Олар тау-кен және құрылыс салаларында 3 жыл мерзімге басшы лауазымдарды атқару құқығынан айырылды. Жазаларын қауіпсіздігі төмен қылмыстық-атқару жүйесінде өтейді.
Үкім әлі заңды күшіне енген жоқ.
2025 жылдың 17 ақпанында Ұлытау облысындағы «Жомарт» кенішінде тау-кен массасының опырылуы салдарынан жеті жұмысшы үйінді астында қалып, барлығы қаза тапты.
2024 жылы Қазақстанда шахтадағы апат бірнеше рет орын алды. Былтыр 31 тамызда Шығыс Қазақстан облысының Глубокое ауданындағы KAZ Minerals компаниясына қарасты «Ертіс» шахтасында газдан улану салдарынан төрт жұмысшы қаза тапты. Олардың екеуі кәсіпорынның, екеуі мердігер ұйымның қызметкерлері болған. Сол түні, 1 қыркүйекке қараған кезде, дәл осы компанияның «Артемьев» шахтасында тас құлауы нәтижесінде мердігер ұйымның бір үңгушісі қайтыс болды.
Сурет: istockphoto.com
