Қазақстан Global Innovation Index-2024 рейтингінде Орталық және Оңтүстік Азия елдері көшбасшыларының үштігіне енді. 2007 жылдан бастап Global Innovation Index (WIPO) 133 елдің көрсеткіштерін 80 бағыт бойынша бағалап келеді. Бұл жерде экономика мен өндірістің өсуіне инновациялардың ықпалы қарастырылады.
Рейтинг осы саладағы жаңа стратегияларды әзірлеу үшін маңызды индикатор ретінде қызмет етеді. Онда жоғары көрсеткішке ие болу іске асырылып жатқан мемлекеттік реформалардың халықаралық деңгейде бағаланғанын көрсетеді. Сондай-ақ әлемдік аренадағы беделді жақсартуға және Қазақстанға тікелей инвестициялар тартуға ықпал етеді.
Қазақстан жаһандық рейтингте 81-орыннан 78-орынға көтеріліп, Үндістан мен Ираннан кейін Орталық және Оңтүстік Азия көшбасшылар үштігіне енді.
Елімізде «Мемлекеттік басқарудың тиімділігі», «Заңның үстемдігі», «Оқу, математика және жаратылыстану ғылымдары бойынша PISA шкаласы», «Нарықтың дамуы», «Бизнесті жүргізу», «Тікелей инвестициялардың таза ағыны, ІЖӨ %» көрсеткіштері бойынша ілгерілеу байқалады.
Рейтингтегі ең үлкен өсім «Креативті тауарлар мен қызметтер» көрсеткіштерінде болды. Бұл жерде 93-орыннан 65-орынға, «Ұлттық көркем фильмдер/млн адам» 61-орыннан 31-орынға және «Жоғарғы деңгейдегі домендер (TLD)/мың адам» 115-тен 80-ге дейінгі сатылардан көрінді.
Айтып өтелік, Дүниежүзілік зияткерлік меншік ұйымы (UN WIPO) – Біріккен Ұлттар Ұйымының 15 мамандандырылған мекемесінің бірі, оның қызметі шығармашылық қызметті ынталандыруға және зияткерлік меншікті (IP) халықаралық қорғауға ықпал етуге бағытталған. WIPO тауар белгілері мен патенттерді халықаралық тіркеуді жеңілдетеді.
Жаһандық инновациялық индекс – инновациялардың елдердің дамуына әсерін анықтау бойынша әлем елдерінің ауқымды экономикалық зерттеуі. Бұл индекстің өсуінің маңыздылығы оны Қытай, Сингапур, БАӘ, Түркия және т.б. елдердің үкіметтік стратегияларына енгізу арқылы анықталады.
Сурет: freepik.com
