Ұлытау облысында «Қазақмыс» корпорациясына қарасты кәсіпорындардың бірінде учаске бастығы 16 млн теңгеден астам қаражатқа бағаланған мүлікті жымқырды деген күдікпен ұсталды. Бұл туралы Сыбайлас жемқорлықты тергеу қоры-бюросы хабарлады.
“Ұлытау облысында «Қазақмыс» корпорациясына қарасты ЖШС қызметкерлерінен құралған екі топ ұсталды. Олар кәсіпорынның материалдық құндылықтарын жымқырды деген күдікке ілінді”, — деп көрсетілген хабарламада.
Бірінші топта учаске бастығы бар. Тергеу мәліметінше, олар жалпы құны 16 млн теңгеден асатын кәсіпорын мүлкін ұрлаған.
Екінші топта қылмысқа корпорация басқармаларының бірінің басшысы қатысқан. Күдіктілер ұрланған мүлікті құжаттарды қолдан жасау арқылы кәсіпорын аумағынан алып шыққан. Барлық күдіктілер қамауға алынған.
Еске сала кетсек, былтыр қазан айында құқық қорғау органдары «Қазақмыс» корпорациясы аумағынан қымбат металдар қорытпасын ұрлаған топтың әрекетін тоқтатты. Топ құрамында кәсіпорын қызметкерлері болған. Күдіктілер 6,5 млн теңге сомасындағы ұрланған өнімді алып шықпақ болған кезде ұсталды.
Polisia.kz мәліметінше, елдегі өнеркәсіптік кәсіпорындардан мүлік жымқырудың анықталған жалғыз фактісі емес. Бұған дейін Павлодар облысындағы Алюминий зауытында жұмысшылардың металл ұрлап, жалпы сомасы 30 млн теңге шығын келтірген.
Сонымен қатар, 2023 жылы «Qarmet» АҚ-да ұйымдасқан қылмыстық топтың жетекшісі мен мүшелері кәсіпорын мүлкін жымқыруға қатысқаны үшін ұзақ мерзімге бас бостандығынан айырылған еді.
Сурет: Ашық дереккөздерден
