2024 жылы 17 желтоқсанда «Қазақмыс корпорациясы» ЖШС «Жезқазғантүстімет» ӨБ құрамына кіретін Оңтүстік Жезқазған мен Жыланды кеніштерінің қызметкерлері ұжымдық талаптарын білдірді.
Ереуілшілер алдымен халықаралық нарықта мыс бағасының өсуі, доллар бағамының көтерілуі, азық-түлік пен коммуналдық қызметтердің қымбаттауына байланысты жалақыны 30%-ға көтеруді сұрады. Одан кейін жалақыны 100%-ға арттыруды, мемлекеттік органдар тарапынан болатын қысымды төмендетуді де талап етті.
Оқиғаның мән-жайы
Facebook желісінде Қайрат Баукен есімді қолданушы оқиға жөнінде былай деп баяндады:
«2024 жылғы 18 желтоқсанда сағат 18:30-дегі жағдай бойынша Ұлытау облысы Сәтбаев қаласында «Қазақмыс» корпорациясының «Жезқазғантүстімет» Оңтүстік Қазақстан филиалына қарасты №65 шахтаның жұмысшылары жұмысын тоқтатты. Бізге мәлім ақпаратқа сәйкес, сағат 15:30-да 2-ауысымдағы жұмысшылардың жоғары көтеріліп, 3-ауысымдағылардың шахтаға түсіп жатқан кезінде басталды, алайда 2-ауысым жұмысшылары жұмыс істеуден бас тартты.
Келіссөздер жүргізу үшін шахтаға Оңтүстік руднигінің басшысы М. Алдабергенов түсті. Шахтада шамамен 254 жұмысшы жиналды (нақтылануда). Сағат 16:50-де шахтаға облыс әкімдігінің және құқық қорғау мен арнайы органдардың өкілдері келді», — делінген.
Қайрат өзінің парақшасында осы кәсіпорында істейтінін көрсеткен.
«Қазақмыс» корпорациясының жұмысшыларға берген жауабы
Кеше, 17 желтоқсанда «Қазақмыс» корпорациясы 2025 жылдың басында жаңа ұжымдық шарт бойынша жұмыскерлердің жалақысы өсетінін және әлеуметтік пакеттер қосатынын айтқан еді.
Бүгін жұмысшылар талабына жауап берген «Қазақмыс корпорациясы» ЖШС-ның бас директоры қызметкерлермен кездесіп, түсіндіру жұмыстарын жүргізгенін, жыл сайын жалақыны өсіріп отырғанын айтты.
«Қазақмыс корпорациясы» 2020 жылдан бастап жыл сайын жалақыны көтеріп келеді. Осы кезеңде жалақының орташа деңгейі 151%-ға – 2020 жылғы 326 196 теңгеден 2025 жылға арналған ағымдағы болжамдарға дейін көтерілді. Жалақының одан әрі күрт өсуі компания шахталарының рентабельділігіне қауіп төндіруі мүмкін», — деді компания хабарламасында.
Корпорацияның мәліметінше, осы уақытқа дейін компанияда ең төменгі жалақы – 363 000 теңге (мысалы, тазалаушы), орташа жалақы – 650 000 теңге, жерасты жұмысшыларының жалақысы – 1 202 000 теңге болғанын мәлімдеді.
«Қазақмыс корпорациясы» 2025 жылдан бастап индекстеу 2024 жылы Ұлттық статистика бюросы ресми түрде белгілеген инфляция деңгейіне жүргізіледі деді.
«Жалақыны 8,5%-ға арттырған кезде корпорация бойынша орташа жалақы 822 000 теңгеге дейін (2024 жылы — 730 431 теңге), ал жерасты жұмысшылары үшін — 1 303 000 теңгеге дейін (2024 жылы — 1 202 000 теңге) өседі», — деді корпорация.
«Қазақмыс» корпорациясының 70% акциясы кәсіпкер, «Қазақмыс» президенті Владимир Кимге, 30%-ы «Қазақмыс корпорациясы» ЖШС директорлар кеңесінің төрағасы Эдуард Огайға тиесілі.
Сурет: Depositphotos
