17 қарашада Астана қаласындағы екі қабатты жеке үйлердің бірінде өрт шығып, он үш, тоғыз, үш, екі жасар төрт бала қаза тапты. Бүгін, 18 қараша осы оқиғаға қатысты қылмыстық іс қозғады. Бұл туралы Астана қаласы төтенше жағдайлар департаменті хабарлады.
«Төтенше жағдайлар департаментінің анықтау бөлімі «Өрт қауiпсiздiгi талаптарын бұзу» бабы (Қылмыстық кодекстің 292-бабы 3-бөлігі) бойынша қылмыстық іс қозғады» делінген баспасөз хабарламасында.
Тергеуге қатысты істің мән-жайы тексеру толық аяқталғаннан кейін айтылады.
Хабарлама келіп түскен сәттен бастап, 6 минут аралығында оқиға орнына жеткен құтқарушылар үйдің өртке оранғанын көрген.
«Бұл үйде екі отбасы тұрған. Балалары құрбан болған және зардап шеккен отбасыға психологиялық, материалдық, басқа да қажетті көмек көрсетіледі. Туыстарына қайғыра көңіл айтамыз», — деген Астана әкімдігі таратқан хабарламада.
Естеріңізге сала кетейік, қазан айында Қостанай облысының Жітіқара қаласында өрт орнынан бес бала өлі күйде табылған болатын.
Сурет: ТЖМ