Алатау қаласы 2024 жылдың қаңтар айында Мемлекет басшысының Жарлығымен құрылды. Осы уақытқа дейін Алматы іргесінде бой көтеретін Alatau City жобасын іске асыру бойынша келіссөздер жүргізілді.
5 қарашада вице-премьер Қанат Бозымбаев пен Қытай даму институтының вице-президенті Цзянь Цюй кездесіп, аталмыш қаланың салынуына Қытай даму институтының (China Development Institute) қызығушылығы барын ескертіп, көмектесетінін айтты. Институттың осыған дейін 10 елде АЭА құру бойынша тәжірибесі бар.
«Біз білімімізбен бөлісуге және нақты мәселелер бойынша қажетті ұсыныстар беруге дайынбыз», – деді Цзянь Цюй кездесу барысында.
Еске сала кетейік, қаланың кешенді жоспарын Сингапур елінің Surbana Jurong компаниясы әзірлеген болатын. Қаланы салудағы негізгі мақсат та – Сингапур стиліндегі қаланы тұрғызу.
«Біз Сингапур стиліндегі мүлдем жаңа әрі интеграцияланған мегаполис салуға ниеттіміз. Ол әлемдік стандарттарға сай келетін жетекші халықаралық іскерлік хабқа айнала алады» – деген еді мамыр айындағы кездесу кезінде Мемлекет басшысы.
Қаланың бас жоспары осы жылдың мамыр айында бекітіліп, қазір жобалау кеңсесі өз жұмысын белсенді жүргізіп жатыр.
Қаланың бас жоспарында кезінде Іле, Талғар аудандары мен Қонаев қаласының шекаралары өзгертілген еді. Сондай-ақ Президент G4 City арнайы экономикалық аймағының аумағын 30 мың гектардан 96,5 мың гектарға дейін ұлғайтып, оның атауын Alatau арнайы экономикалық аймағы деп өзгерту туралы шешімді шығарды.
Қаланың бас жоспары көрсетілген құжатта Алатау қаласы Алматы қаласын «Қорғас» халықаралық шекарамаңы ынтымақтастығы орталығымен (Қытай) байланыстыратын маңызды дәліз болатын А3 (Алматы – Қонаев) автомагистралі бойында орналасқан және «Жаңа Жібек жолы» бастамасының стратегиялық артықшылықтарын пайдаланады деп жазылған.
Болашақ Алатау қаласының көрінісі
Жобаны іске асырушылардың пікірінше, қала республикалық маңызы бар Алматы-Өскемен тасжолының бойында орналасады. Жалпы аумағы 88 мың гектар болатын аймақта қазіргі таңда 53 мың тұрғын, 12 елдімекен бар. Жоба бойынша Алатау қаласына Жетіген ауылы, Талғар ауданындағы Дәулет және Қайрат ауылдары; Іле ауданындағы Жетіген, Еңбек, Жаңаарна, Құйған, Жаңадәуір, Жаңаталап, Ынтымақ, Қоянқұс елдімекендері мен Қонаев әкімшілігіне қарасты Заречное және Арна ауылдары кіреді.
Алматының солтүстігінде 60 км жерде орналасатын қала 4 бөліктен тұрады деп жоспарланған:
«Gate District» – ірі іскерлік орталық және халықаралық алмасу және сауда орталығы;
«Golden District» – дамудың озық әдістерін қамтитын білім және медицина орталығы;
«Growing District» – Қытай мен Ресей арасындағы ғылыми-өндірістік орталық және түйінді көлік торабы;
«Green District» – казино-орталықты, экологиялық аймақтар мен белсенді демалысты біріктіретін қала.
Қазіргі дейін бұқаралық ақпарат құралдарында Alatau City жобасына 40-қа жуық инвестор қызығып отырғаны айтылды.
Сурет: bes.media
