13 қаңтар күні сағат 20:00 шамасында Ақтөбе қаласындағы жеке тұрғын үйде бір әйел кепілге алынған. Жертөледе пышақ жарақатын алған ата-анасы да болған. Бұл туралы Ақтөбе қаласының полициясы хабарлады.
Полиция мәліметінше, күдікті ешқандай талап қоймаған. Әйелді босатудан бас тартқан күдіктіні арнайы күштер шабуыл жасау арқылы тоқтатады.
Арнайы операция нәтижесінде күдікті ұсталып, кепілге алынған әйел босатылды. Оқиға орнын тексеру кезінде жертөледен пышақ жарақатын алған әйелдің қарт ата-анасы да табылған.
Ақтөбе қаласы полоициясының хабарлауынша, жараланғандардың бірі жеткізу кезінде қайтыс болды, ал екіншісі ауруханада жан тапсырды. Үшінші жараланған адам дәрігер қарауында.
Азаттық редакциясына сұхбат берген Ақтөбедегі көпсалалы облыстық ауруханасы бас дәрігерінің орынбасары Азамат Тұрышев кепілдіктен босатылған әйелдің миы шайқалғанын, басы мен бетінде жарақаты барын айтты.
«Бүгін түнде сағат 12:30-да біздің облыстық ауруханаға жедел жәрдем көлігімен екі науқасты әкелді. Біреуі 1984 жылғы әйел адам. Бас миы шайқалған, басынан жарақат алған, бетінен жарақат алған, кесілген, қанталаған. Келгеннен бастап жан сақтау бөліміне жатқызылды, сол жерде ем тағайындалды. Таңертеңгі жағдайы орташа, алып бара жатқан шағымы жоқ, бүгін бұйырса палатаға аударамыз», — деді.
Аталған факті бойынша қылмыстық іс қозғалды. Күдікті уақытша ұстау изоляторына қамалды.
