Саяжайларға қала статусын беру мүмкін емес екенін айтты Орал қаласы әкімінің орынбасары Азамат Халелов.
«Жер кодексінен басқа да заңнамаларға қарайтын болсақ, саяжайлар ауыл шаруашылығы мақсатында пайдаланатын жерлерге жатады. Соның ішінде саяжай бағбандықпен айналысу мақсатындағы жер санатына кіреді. Жалпы бұл аймақтар өзара рекреациялық аймақтарда, яғни су, орман алқаптарында, қала деңгейінен төмен аймақтарда орналасқан. Сондықтан оларға қала статусын беру мәселесі қаралмайды. Себебі о бастан суға кететін аймақ болып табылған жерлерге қала статусын беріп, жыл сайын суға кетірген, былай айтқанда, тиімсіз», — дейді ол.
3 ақпанда Орал қаласының іргесіндегі «Құс фабрикасы» бау-бақша серіктестігінің тұрғындары бір тәулік бойы жарықсыз отырғандарына наразылық білдіріп, жолды жапқан болатын. Ереуілге себеп болған жағдай бұрынғы серіктестік төрағасы жарықтың ақшасын электр желілері компаниясына төлемеген. Салдарынан «Батыс Қазақстан аймақтық электр желілік компаниясы» таңертеңгі сағат 11:00-ден бастап жарықты өшіріп тастаған. Бұл ауданда шамамен 200-ден астам үй бар.
Осы оқиғадан соң Sarapshy.info тілшісі Орал қаласы әкімінің орынбасары Азамат Халеловпен кездесіп, қаладағы саяжай мәселесіне қатысты сауал қойды.
«Былай айтқанда қаламызда 176-дан астам саяжай бірлестігі бар. Соның ішінде 20 мыңнан астам саяжай учаскелері бар. Ол жердегі халықты санау мүмкін емес», — деді қала әкімінің орынбасары.
Редакция қазіргі уақытта саяжайдағы мәселелерді қамтып, сараптамалық мақала дайындап жатыр. Мақалада бау-бақша серіктестіктеріндегі әлеуметтік нысандардың болмауы, жол мәселесі мен көктемгі су тасқыны маусымына қатысты тақырыптар қамтылады.
Сурет: БҚО әкімдігі
