Өңірде кейінгі екі жылда қант диабеті сырқатына шалдыққан науқастар саны 19%-ға өскен.
Жыл сайын Қарағанды облысында қант диабетімен ауыратын 3 мың адам тіркеледі. Аталмыш сырқаттың белең алуына қатысты дәрігерлер дабыл қағып отыр. Денсаулық сақтау басқармасының келтірген мәліметіне сүйенсек, Қарағанды облысында 40 мың тұрғын осы дертке шалдыққан. Науқастардың ішінде 1800 адам инсулинге тәуелді, өйткені олардың ағзасына дерт ауыр зардабын тигізуде. Ең өкініштісі, адам ағзасында зат алмасу процессі бұзылғандықтан науқастың саусақтарын немесе аяғын кесіп тастауға тура келеді.
Былтыр өңірде 100 адамға осындай ота жасалған. Медицина саласының мамандары қант диабетінің алдын алу шараларын жүргізеді. Бұл мақсатта Қарағанды қаласында қант диабеті сырқатының алдын алуға бағытталған орталық ашылған. Бұл орталық облыстық клиникалық ауруханада орналасқан. Дәрігерлер салдары ауыр сырқатқа шалдыққан жандарға бірінші кезекте жақын-жуығы мейірім көрсетіп қолдау білдіруі қажет дейді. Өйткені кез келген сырқатпен күресу үшін адам психологиялық тұрғыда мықты болуы керек.
«Мүгедек болып қалған мұндай науқастар үшін протез жасату және денсаулығын оңалту дегеніңіз – үлкен проблема. Тіршілік үшін күресу науқастың өзіне және тума-туыстарына байланысты. Өйткені науқас аяғынан айрылғаннан кейін бұл мәселемен бетпе-бет жалғыз қалып қойса, статистика мұндай жандардың бес жылдан артық өмір сүрмейтінін көрсетеді», — дейді Диабеттік табан орталығының директоры Евгений Морозов.
Орталықта хирург, невропатолог, подолог, эндокриндік жүйе дәрігері,көз дәрігері бар. Мұнда келген науқасқа мамандар кешенді түрде көмек көрсетеді. Бұл орталыққа көбінесе қант диабеті сырқаты нақтыланып, диспансерлік бақылауға қойылған науқастарды жібереді. Дәрігерлер орталықтан көмек сұрағандарға сырқатты асқындырып мүгедектікке ұрынып қалмауы үшін алдын алу шараларын жасауға үйретеді. Сондай-ақ диабеттік сырқатқа облыста жылына 130 бала шалдығады. Сырқаттың белең алуына көп жағдайда адамдардың дұрыс тамақтанбауы мен семіздікке шалдығуы себеп болуда.
«Диабеттің асқынуы маңызды проблема болып қалуда. Облыстық клиникалық аурухананың хирургиялық инфекция бөлімшесінде 2024 жылы 975 пациент емделді, олардың 46%-ында (450 адам) қант диабеті асқынды. Гангрена себебінен аяқтың төменгі жағын ампутациялаудың 99 жағдайының 63%-ы диабеттік табан синдромымен байланысты», — деп хабарлады облыстық денсаулық сақтау басқармасы.
Науқастар үшін тамақтану режимін сақтап диетаны ұмытпау маңызды дейді дәрігерлер. Қарағанды қаласында қант диабетіне шалдыққандарға көмектесу үшін бес емханадан арнайы кабинеттер ашылған.
«Диабетпен ауырып келе жатқаныма 20 жылдан асты. Маған тұқым қуалау арқылы берілген. Анам ауыратын еді. Осы сырқатпен өмір бойы арпалысып келемін. Өмір сүргің келеді, сол себепті дәрігерлердің айтқанын бұлжытпай орындау керек. Диета сақтамай өз-өзіне қарамаған адамдар мүгедек болып жатыр. Бастысы режимды сақтап өзіңді күткен абзал», — дейді қала тұрғыны Нескен Әлімбаева.
Сурет: Pexels.com
