«Еуразия» трансшекаралық сауда орталығы Орал қаласындағы әуежайға жақын жерде орналасады. Бұл нүкте Ресейдің ірі қалалары Орынбор, Саратов, Самара, сондай-ақ Шығыс Еуропа елдерімен байланысатын маңызды көлік және логистика торабы болмақ. Бұл жөнінде Сауда және интеграция министрі Арман Шаққалиев хабарлады.
Сауда орталығын дамыту үшін арнайы индустриалды аймақ құрылып, келесі өнімдер өндіруге бағытталған инвестициялық жобалар жүзеге асырылады:
● Бояулар мен полимерлі жабындар өндірісі
● Пластикалық қаптамалар мен контейнерлер
● 3D декор-панельдер
Бұл жобаға Kazkomservice, Mis PRO және Smart3D Technology Kazakhstan компаниялары қатысады.
Экономикалық әсері
Арман Шаққалиевтің айтуынша, «Еуразия» орталығының іске қосылуы Батыс Қазақстан облысының экономикасына бірнеше жағымды әсер береді:
● жүк және тауарларды жеткізудің халық шаруашылығындағы үлесін 5-10% -ға төмендету;
● логистикалық шығындардың төмендеуі есебінен инфляция деңгейін төмендету;
● өндірістерді орналастыру жобаларының инвестициялық тартымдылығын арттыру.
«Еуразия» трансшекаралық сауда орталығын 2026 жылы толық іске қосу жоспарланған.
Былтыр Сауда және Интеграция министрлігі елде алдағы үш жыл ішінде бес шекара хабын құру жоспары туралы айтқан еді. Хабтардың негізгі мақсаты — шекара маңындағы елдермен экономикалық ынтымақтастықты нығайту және тауар айналымын ұлғайту.
«Орталық Азия» халықаралық өнеркәсіптік кооперация орталығы (Түркістан облысы):
● Өзбекстанмен байланыстырады, ауыл шаруашылығы мен өнеркәсіп өнімдерін өңдейді.
● Ауғанстан мен Орталық Азия елдерінің нарығына бағытталған.
● 2026 жылдың IV тоқсанында іске қосылады.
Жамбыл облысындағы индустриялық кешен:
● Қазақстан мен Қырғызстан шекарасында орналасады.
● «Алатау» индустриялық кешені ауыл шаруашылығы өнімдерін сақтау және қайта өңдеу орталығы.
● 2026 жылдың III тоқсанында іске қосылады.
«Еуразия» трансшекаралық сауда орталығы (Батыс Қазақстан облысы):
● Қазақстан мен Ресей шекарасында орналасады.
● Солтүстік және Шығыс Еуропа елдерімен саудаға бағытталған.
● 2025 жылдың III тоқсанында іске қосылады.
«Каспий торабы» (Маңғыстау облысы):
● Әзірбайжан, Түрікменстан, Ресей және Иранмен байланыстырады.
● «Саржа» теңіз терминалының құрылысы жүріп жатыр (қуаты 10 млн тонна).
● «Ақтау» және «Құрық» порттарында контейнерлік хабтар салынады.
● 2026 жылдың III тоқсанында іске қосылады.
«Қорғас» халықаралық шекаралық ынтымақтастық орталығы (Жетісу облысы):
● Қытаймен шекарадағы «Қорғас торабы» кеңейтіледі. Азық-түлік сақтау және тарату орталығы құрылады.
● 2024 жылдың III тоқсанында іске қосылады.
«Хабтар құру шекара маңындағы елдермен сауда қарым-қатынастарын жеделдетіп, шикізаттық емес экспорт көлемін 30%-ға арттырады және бизнесті жүргізудегі логистикалық рәсімдерді жеңілдетеді» — делінген министрлік хабарламасында.
Сурет: Сауда және интеграция министрлігі
