2024 жылғы 1 қарашадағы жағдай бойынша Қазақстан аумағында жергілікті атқарушы органдардың рұқсатымен 13 246 шетел азаматы жұмыс істеп жатыр.
Еңбек нарығына тартылған шетелдік мамандар мына санаттар бойынша бөлінеді:
- Басшылар мен олардың орынбасарлары (бірінші санат) – 543 адам;
- Құрылымдық бөлімшелердің басшылары (екінші санат) – 2 514 адам;
- Мамандар (үшінші санат) – 4 859 адам;
- Білікті жұмысшылар (төртінші санат) – 917 адам;
- Маусымдық жұмыстарға – 1 120 адам;
- Корпоративтік ауыстыру аясында – 3 293 адам.
Қазақстанда шетелдік жұмыс күшін пайдаланатын 1 789 жұмыс беруші бар. Бұл ұйымдарда 389,8 мыңнан астам Қазақстан азаматы жұмыс істейді, олар қызметкерлердің жалпы санының 96,8%-ы болады.
Шетелдік еңбек мигранттары ең көп тартылған салалар:
- Құрылыс – 5 155 адам;
- Өңдеу өнеркәсібі – 1 387 адам;
- Әкімшілік және көмекші қызметтер – 1 363 адам;
- Тау-кен өнеркәсібі және карьерлерді қазу – 1 359 адам;
- Ауыл, орман және балық шаруашылығы – 1 168 адам.
Еңбек мигранттары қайдан келеді?
Шетелдік жұмысшылардың негізгі бөлігі Қытай, Өзбекстан, Түркия және Үндістан елінен.
- Қытай – 4 664 адам;
- Өзбекстан – 1 230 адам;
- Түркия – 1 150 адам;
- Үндістан – 1 108 адам.
ҚР Еңбек және халықты әлеуметтік қорғау министрлігі жыл сайын шетел мамандарын тартуға квота белгілейді. 2024 жылы бұл квота жұмыс күшінің жалпы санына қатысты 0,23% немесе 17,2 мың бірлік болып белгіленді.
Инвесторды қолдау
«Еңбек қызметін жүзеге асыру үшін шетелдік жұмыс күшін тартуға жергілікті атқарушы органдардың рұқсаты талап етілмейтін адамдардың тізбесін айқындау туралы» ҚР Үкіметінің 2023 жылғы 24 қарашадағы № 1041 қаулысына өзгеріс енгізілмек. Осыған байланысты құжат «Ашық НҚА» порталында 2024 жылы 26 қарашада жарияланды.
Жаңа қаулы бойынша Қазақстанда 100% шетелдік инвестициямен жұмыс істейтін компаниялар өздерінің басшыларын немесе орынбасарларын жергілікті органдардан арнайы рұқсат алдырмай-ақ жұмысқа тарта алады. Бұл – шетелдік инвесторлар үшін жеңілдік жасауға бағытталған шешім.
Сурет: inbusiness.kz
