Активтерді қайтару бойынша жүргізіліп жатқан жұмыс аясында тізілім субъектілерімен 12 млрд теңгеге әлеуметтік жобаларды іске асыру бойынша төрт келісімге қол қойылды. Бұл туралы Бас прокуратураның Активтерді қайтару жөніндегі комитетінің баспасөз қызметі хабарлады.
Жүйелі жұмыс нәтижесінде құны 12 млрд теңгеге әлеуметтік жобалар іске асырылмақшы.
Солардың бірі — Алматы қаласында заманауи мәдениет орталығын салу жобасы.
«Ғимараттың ауданы үш мың шаршы метрден асады және арнайы залдар мен әмбебап көрме алаңдарын, білім беру және демалыс орындарын қамтиды. Нысан іске қосылғаннан кейін жыл сайын халықтың әлеуметтік осал топтарынан келушілерге тегін репетициялар мен шеберлік сабақтары өткізіледі деп күтіліп отыр», — делінген комитеттің хабарламасында.
Тағы бір мысал, Шымкентте мұқтаж отбасыларды одан әрі қамтамасыз ету үшін мемлекет меншігіне өтетін көпқабатты тұрғын үй құрылысы қолға алынбақшы.
Прокуратураның мәліметінше, бұл бағыттағы жұмыс жалғасады.
Айтып өтелік, осыған дейін арнаулы мемлекеттік қорға 176,3 млрд теңге түскенін хабарлаған едік.
«Арнаулы мемлекеттік қорға түсім 176,3 млрд теңгені құрады. Оның ішінде Басқарушы компаниядан түскен қаражат 5,7 млрд теңге, активтерді сатудан 5,559 млрд теңге және активтерді басқарудан 141 млн теңге бар», — деді Қаржы министрлігі Мемлекеттік мүлік және жекешелендіру комитетінің төрағасы Бақытбек Тәшенов.
Арнаулымемқордың қаражаты әлеуметтік және экономикалық жобаларды қаржыландыруға жұмсалады.
Жалпы 2022 жылдан бері 1,5 трлн теңге көлемінде активтер қайтарылған. Оның ішінде қылмыстық, азаматтық, әкімшілік істер бойынша өндірілген сомалар мен мүліктер бар.
Сурет: freepik.com
