Вице-премьер Серік Жұманғарин Қытай коммунистік партиясы Орталық комитетінің (ҚКП ОК) Бірыңғай фронт жұмыс бөлімі министрінің орынбасары және Бүкіл қытайлық өнеркәсіп және сауда федерациясы төрағасының бірінші орынбасары Шэнь Инмен Астанада кездесті.
Онда Қазақстан мен Қытай арасындағы сауда-экономикалық қарым-қатынастың жоғары серпіні туралы сөз қозғалды.
«Қытай дәстүрлі түрде Қазақстанның ең ірі сауда серіктесі саналады және экономикасына инвестиция салатын үздік бес елдің қатарына кіреді. Өткен жылы Қазақстан мен Қытай арасындағы тауар айналымы 30%-ға өсіп, рекордтық 41 млрд АҚШ долларына жетті. Биыл бірінші жартыжылдық қорытындысы бойынша тауар айналымының өсуі шамамен 20%-ды құрап отыр», — дейді Серік Жұманғарин.
2005 жылдан бастап Қытайдан Қазақстанға құйылған жалпы инвестиция көлемі 25 млрд АҚШ долларына жуықтаған. Тек өткен жылы тікелей қытайлық инвестициялар көлемі 15%-ға өсіп, 1,6 млрд АҚШ долларынан асты.
Бүгінде бірлескен инвестициялық жоба саны 90-нан асып, энергетика, тау-кен металлургия кешені, машина жасау, электротехника, ауыл шаруашылығы, көлік инфрақұрылымы, білім беру, туризм және басқа да салаларды қамтиды.
Серік Жұманғарин қытай бизнесін бірлескен жобаларға қатысуға шақырды.
«Бүгінде біздің еліміздің аумағында қытай капиталының қатысуымен 3 000-ға жуық бірлескен компания табысты жұмыс істеп жатыр. Олардың төрттен біріне жуығы соңғы жылы ғана қосылды. Бұл қытай іскер топтардың Қазақстандағы бизнес-климатқа жоғары сенім білдіретінін және біздің серіктестігіміздің тұрақтылығын дәлелдейді», — деп атап өтті вице-премьер.
Серік Жұманғарин өзара қарым-қатынастың әлеуетін күшейтудің кең ауқымды бағыттарын атап өтті. Оның ішінде қант саласын дамыту шеңберінде – қант зауыттарының құрылысын инвестициялау, сондай-ақ астықты терең өңдеу кәсіпорындарының санын арттыруға қызығушылық бар екенін айтты. Қазақстан ұқсас және басқа да инфрақұрылымдық жобаларды жүзеге асыруға барынша қолдау көрсетуге дайын екенін мәлімдеді.
Айтып өтелік, 1953 жылы құрылған Бүкілқытайлық өнеркәсіп және сауда федерациясы (ACFIC) – Қытайдың халықтық ұйымы және үкіметтік емес сауда палатасы. Ол ҚХР-ның өнеркәсіпшілері мен бизнесмендерінен тұрады.
ACFIC штаб-пәтері Бейжіңде орналасқан. Федерацияның провинциялық, муниципалдық және аудандық деңгейлерде 3 200-ден астам жергілікті бөлімшелері, сондай-ақ қалалық аудандарда, қауымдастықтар мен ауылдарда 5,5 миллионға жуық бастапқы бөлімшелері бар. Федерация бүкіл ел бойынша 5,1 миллион тіркелген мүшеден тұрады.
Былтыр Қазақстанның Қытаймен тауар айналымы 31,5 млрд АҚШ долларды (+30,1%) құрады. 2024 жылдың қаңтар-маусым айларында – 14,1 млрд АҚШ доллар (+3,8%) болды.
Осыған дейін, Қазақстанда тіркелген қытайлық компаниялар санының күрт өскенін жазған едік.
Елде 1 қыркүйекте қытайлық меншік иелері бар заңды тұлғалар мен филиалдар саны 4 674 болды, бұл 1 тамыздағыға қарағанда 150 бірлікке көп.
Сондай-ақ көктемде екі ел арасындағы сауда айналымы 40 млрд долларға жетті. Бұл – рекордтық көрсеткіш болды. Қазақстанның алдағы мақсаты сауда-саттық көлемін 100 млрд долларға дейін жеткізуболып отыр.
Сурет: gov.kz
