Қазақстанда тұрғындардың банк депозиттеріндегі қаражаты бір ай ішінде 141 млрд теңгеге қысқарды. Бұл туралы Ұлттық банк хабарлады.
Депозиттер көлемінің төмендеуіне ең алдымен ағымдағы және карталық шоттардағы қаражаттың 4%-ға азаюы әсер еткен. Сондай-ақ мерзімді және мерзімсіз депозиттер де 0,66%-ға кеміген.
Сонымен қатар жинақтаушы салымдар көлемі керісінше өсім көрсеткен. Бір айда олардың көлемі 3,31%-ға артып, 4 трлн теңгеге жеткен. Жыл басында бұл көрсеткіш 2,6 трлн теңге болған. Осылайша, жинақтаушы депозиттер 52%-ға ұлғайған.
Биыл маусым айында жеке тұлғалардың депозиттері бойынша орташа мөлшерлеме 14,2%-ды құрады. Ұлттық банктың деректеріне сәйкес, аталған мөлшерлеме 1996 жылдан бергі ең жоғары көрсеткіш саналады.
Экономист маман Нұрсұлтан Ерболатұлы Sarapshy.Info-ға берген сұхбатында инфляция деңгейімен күресу үшін Ұлттық банк базалық мөлшерлемені жоғары деңгейде ұстап, қатаң ақша несие саясатын ұстанатынын атады.
«2025 жылдың маусымында елімізде инфляция деңгейі 11,8%-ды құрады. Депозит сыйақысының тиімді мөлшерлемесі жоғары болғанымен ол табысты уақыт өте келе инфляция жеп қояды. Екіншіден, теңгенің долларға құнсыздануы жалғасып келеді. Маусымда доллардың бағамы антирекордқа жетті.
Базалық мөлшерлеме өскен сайын несиенің де құны артады. Сәйкесінше депозит ставкасы да тұтынушы үшінтартымды болады.
Егер елде инфляцияның өсу қарқыны ауыздықталмаса, Ұлттық банк базалық мөлшерлемені әрі қарай көтере алады. Жоғары базалық мөлшерлеме несиені қымбат етіп, экономиканы кредиттеу тарылады. Дегенмен де несиенің жоғары пайызына қарамастан тұтынушылық несие азаймай тұр. Бұл тұтынушыға пайыздың өсімі әсерін беретіні екіталай екенін көрсетіп отыр», — деді сарапшы.
фото: freepik.com
