«БЖЗҚ» АҚ 2025 жылға арналған ең төменгі жеткілікті шек (ТЖШ) деңгейін 2024 жылғы көрсеткішпен бірдей сақталғанын мәлімдеді. Бұл шек – зейнетке шыққанда ең төменгі зейнетақы мөлшерінде ай сайынғы төлем алу үшін шотта қалуы керек ең аз ақша.
Жинақтың бұл мөлшері Қазақстанның әлеуметтік-экономикалық көрсеткіштері мен зейнетақы жинақтарының болжамды кірісіне негізделіп есептеледі делінген хабарламада. 2025 жылға арналған жеткілікті шекті есептеу кезінде төмендегі көрсеткіштер пайдаланылды:
- ең төменгі жалақы – 85 000 теңге,
- ең төменгі базалық зейнетақы – 32 360 теңге,
- ең төменгі зейнетақы – 62 771 теңге,
- ең төменгі күнкөріс деңгейі – 46 228 теңге.
ТЖШ деңгейінің өзгеріссіз қалуына, ең алдымен, ең төменгі жалақы мөлшері мен зейнетақы жинақтарының болжамды кіріс деңгейінің өзгермегені әсер еткен.
Айта кетсек, 2024 жылы да ТЖШ мөлшері көтерілген жоқ. Осылайша, 2025 жылы салымшылардың зейнетақы жинақтарын пайдалану талаптары өзгеріссіз қалады.
Сурет: gov.kz