Еңбек және халықты әлеуметтік қорғау министрі Светлана Жақыпова Оңтүстік Кореяда заңсыз жұмыс істеп жүрген қазақстандықтар туралы айтты.
Оның сөзінше, аталған елде жұмыс істеуді реттейтін министрлік әзірлеген келісімшарт Корея тарапына жіберілген. Қазір ол елде құжат қарастырылып жатыр.
«Қазіргі кезде мемлекеттік органдар біздің дайындаған келіciмшартқа келісім беріп, ол құжат Оңтүстік Кореяға сыртқы істер министрлігімен жіберілді. Сол жақта қарастырылып жатыр. Осы жазда Корея Президенті келгенде еңбек министрліктерімен меморандумға қол қойылды, соған сәйкес қазір құжаттармен алмасу жүріп жатыр. Біздің вице-министр Асқарбек Ертаев нақты осы жұмыс бойынша Кореяға барып келді», – деді министр.
Белгілі болғаны, Оңтүстік Корея біздің мемлекетке үш талап қойып отыр. Біріншіден – Кореядағы елшілікте жұмыс туралы атташе лауазымын енгізу. Екіншіден, 15 мыңға жуық біздің азамат ол жақта заңсыз жүр, сол азаматтарды елге шақырыңдар деген талап қойған. Үшіншіден, қазақстандықтар Корея Республикасына жұмыс істеуге барарда халықаралық сертификаттаудан өтуі керек.
«Біз үш өңірде арнайы жаңа орталықтарды даярлап қойдық. Айта кету керек, барлық талабын орындадық, енді күту ғана қалды», – деді Светлана Жақыпова Мәжіліс кулуарында.
Сондай-ақ Оңтүстік Кореяда заңсыз жұмыс істеп жүрген 15 мың қазақстандықты елге қайтарумен Ішкі істер министрлігі айналысып жатқаны белгілі болды.
«Егер олар қазір билет алып, елге оралса, ешқандай әкімшілік, құқықтық міндеттемелер қойылмайды. Ал мерзімінде келмей, қалып қойса, сол жерде құқықтық міндеттемелер туындайды», – дейді ведомство басшысы.
Светлана Жақыпова қазақстандықтарға Оңтүстік Кореяда заңды түрде еңбек етуге рұқсат беру жұмысын жыл соңына дейін аяқтауды жоспарлап отыр.
Шетелде қанша қазақстандық жұмыс істейді?
Жасыратыны жоқ шетелге жылдан жылға жұмыс іздеп баратын қазақстандықтардың саны артып келеді.
Ресми дерекке сүйенсек, еліміздің азаматтары көбіне Ресей, Корея, Түркия және Араб Әмірліктерінде жұмыс істеп жатыр. Биыл шетелде 135 мың қазақстандықтың жұмыста екені анықталған.
Finprom.kz сайтының мәліметінше, былтыр 194 мыңға жуық қазақстандық шетелде жұмыс істеген. Оның 57 пайызы ерлер болса, 43 пайызы – әйелдер.
Сурет: pixabay.com